(A Unit of Dr. T.M.A. Pai Foundation, Manipal)

ರಾಷ್ಟ್ರಗೀತೆ, ರಾಷ್ಟ್ರಧ್ವಜಗಳಂತೆ ರಾಷ್ಟ್ರಭಾಷೆಯಾದ “ಹಿಂದಿ”ಗೂ ಮಾನ್ಯತೆ ದೊರೆಯಬೀಕು. ಜಗತ್ತಿನ ಅತಿಹೆಚ್ಚು ಜನರು ಹಿಂದಿ ಮಾತನಾಡುವವರಾಗಿದ್ದು ರಾಷ್ಟ್ರೀಯ ಏಕತೆಯನ್ನು ಸಾಧಿಸುವಲ್ಲಿ ಅದು ಅಗ್ರಮಾನ್ಯವಾಗಿದೆ ಎಂದು ಉಡುಪಿ ಪೂರ್ಣಪ್ರಜ್ಞ ಸಂಧ್ಯಾ ಕಾಲೇಜಿನ ಹಿಂದಿ ಉಪನ್ಯಾಸಕಿ ಡಾ.ಸುಕನ್ಯಾ ಮಾರ್ಟಿಸ್ ಹೇಳಿದರು.

ಅವರು ಇತ್ತೀಚೆಗೆ ಸ್ಥಳೀಯ ಉಪೇಂದ್ರ ಪೈ ಮೆಮೋರಿಯಲ್ ಕಾಲೇಜಿನಲ್ಲಿ ಆಯೋಜಿಸಲಾದ ಹಿಂದಿ ದಿನಾಚರಣೆ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡುತ್ತಿದ್ದರು. ಪದವಿಯ ನಂತರದ ಹಿಂದಿಯ ಉನ್ನತಾಭ್ಯಯನಕ್ಕೆ ನಮ್ಮಲ್ಲಿ ಅವಕಾಶವಿಲ್ಲದಿರುವುದರ ಬಗ್ಗೆ ಖೈದವನ್ನು ವ್ಯಕ್ತಪಡಿಸಿದ ಅವರು ಇದಕ್ಕಾಗಿ ಮುಂದಿನ ದಿನಗಳಲ್ಲಿ ವಿದ್ಯಾರ್ಥಿಗಳು ಹೋರಾರನಡೆಸಬೇಕು ಎಂದು ಹೇಳಿದರು. ಅಧ್ಯಕ್ಷರಾದ ಕಾಲೇಜಿನ ಪ್ರಾಚಾರ್ಯರಾದ ಪ್ರೊ.ಕೃಷ್ಣಮೂರ್ತಿ ಕೆ. ಇವರು ಹಿಂದಿಯಲ್ಲಿ ಮಾತನಾಡಿ ಹಿಂದಿಯನ್ನು ಕಲಿಯುವ ಬಗೆಗಿನ ಆಧುನಿಕ ಸೌಲಭ್ಯಗಳ ಬಗ್ಗೆ ಮಾಹಿತಿ ನೀಡಿದರು.

ಕಾಲೇಜಿನ ಹಿಂದಿ ಉಪನ್ಯಾಸಕಿ ಶ್ರೀಮತಿ ನಿರ್ಮಲಾ ಶೆಣೈ ಪ್ರಾಸ್ತಾವಿಕ ಮಾತುಗಳನ್ನಾಡಿ ಸ್ವಾಗತಿಸಿದರು. ವಿದ್ಯಾರ್ಥಿ ಮೊಹಮದ್ ಫರಾಜ್ ವಂದಿಸಿದರು. ಅಂತಿಮ ಬಿ.ಬಿ.ಎಂ. ವಿದ್ಯಾರ್ಥಿ ಸತ್ಯರಾಜ್ ಕಾರ್ಯಕ್ರಮ ನಿರ್ವಹಿಸಿದರು.

ಹಿಂದಿ ದಿನಾಚರಣೆ ಪ್ರಯುಕ್ತ ಆಯೋಜಿಸಲಾದ ಸಂಗೀತ ಸ್ಪರ್ಧೆ ಮತ್ತು ಭಾಷಣ ಸ್ಪರ್ಧೆಗಳಲ್ಲಿ ವಿಜೇತರಾದವರಿಗೆ ಈ ಸಂದರ್ಭದಲ್ಲಿ ಬಹುಮಾನಗಳನ್ನು ವಿತರಿಸಲಾಯಿತು.

 ಇನ್ನೊಬ್ಬರ ಪ್ರಾಣ ಉಳಿಸಲು ಕೊಡುವ ರಕ್ತವು ಅತ್ಯಮೂಲ್ಯವಾಗಿದ್ದು ಇಂತಹ ರಕ್ತದಾನದಿಂದ ಪ್ರಾಣರಕ್ಷಣಿಯ ಮಹಾಪುಣ್ಯ ದೊರೆಯುವುದಾಗಿ ಉಡುಪಿ ಜಿಲ್ಲಾಸ್ಪತ್ರೆಯ ರಕ್ತನಿಧಿ ವಿಭಾಗದ ನಿರ್ದೇಶಕರಾದ ಡಾ| ಶರತ್ ಕುಮಾರ್ ಹೇಳಿದರು.

 “ವಿದ್ಯಾರ್ಥಿಗಳಲ್ಲಿ ಓದುವ ಹವ್ಯಾಸ ಅತ್ಯಂತ ಅಗತ್ಯ. ಅದು ಪಠ್ಯ ವಿಷಯವಾಗಿರಲಿ ಅಥವಾ ಪಠ್ಯೇತರ ವಿಷಯವಾಗಿರಲಿ,  ಜ್ಞಾನಾರ್ಜನೆಯ ದೃಷ್ಟಿಯಿಂದ ಅತ್ಯಂತ ಅಗತ್ಯ. ಇಂದಿನ ವಿದ್ಯಾರ್ಥಿಗಳು ಎಲ್ಲಾ ವಿಷಯಗಳನ್ನು ಲಘುವಾಗಿ ಪರಿಗಣಿಸುವ ಮನೋಧರ್ಮವನ್ನು ಬೆಳಸಿಕೊಂಡಿದ್ದಾರೆ ಆದರೆ ಜ್ಞಾನಾರ್ಜನೆಯ ದೃಷ್ಟಿಯಿಂದ ವಿಷಯದ ಅಳವಾದ ಅಧ್ಯಯನ ವಿದ್ಯಾರ್ಥಿಗಳ ಗುರಿಯಾಗಬೇಕು. ತನಗೆ ಅನಿಸಿದ್ದನ್ನು ತನ್ನಲ್ಲಿಯೇ ಚಿಂತನೆ ನಡೆಸಿ ಬರವಣಿಗೆಯ ರೂಪಕ್ಕಿಳಿಸಿದರೆ ಅದು ಹೆಚ್ಚು ಮೌಲಿಕವಾಗಿರುತ್ತದೆ. ಮುಂದೆ ಯಾವುದೇ ಉದ್ಯೋಗ ಅಥವಾ ಉದ್ಯಮಕ್ಕೆ ಸೇರಿಕೊಂಡರೂ ವಿದ್ಯಾರ್ಥಿಗಳು ರೂಢಿಸಿಕೊಳ್ಳುವ ಭಾಷಾಶೈಲಿ ಜೀವನದ ಎಲ್ಲಾ ಸಂದರ್ಭಗಳಲ್ಲಿಯೂ ಪಾತ್ರವಹಿಸುತ್ತದೆ” ಎಂದು ಉದಯವಾಣಿ ಪತ್ರಿಕೆಯ ಮಾರ್ಗದರ್ಶಕ ಸಂಪಾದಕರಾಗಿರುವ ಶ್ರೀ ಎನ್.ಗುರುರಾಜ್ ಅವರು ಅಭಿಪ್ರಾಯ ಪಟ್ಟರು.

 ಅವರು ಉಡುಪಿಯ ಉಪೇಂದ್ರ ಪೈ ಮೆಮೋರಿಯಲ್ ಕಾಲೇಜಿನಲ್ಲಿ 2010-11 ನೆಯ ಸಾಲಿನ ಕಾಲೇಜು ವಾರ್ಷಿಕಾಂಕ ‘ಸುಪ್ರಭಾ’ವನ್ನು ಬಿಡುಗಡೆಗೊಳಸಿ ಮಾತನಾಡುತ್ತಿದ್ದರು.

ದೇಶದ ಪ್ರತಿಯೊಬ್ಬ ನಾಗರಿಕನು ಸದ್ಭಾವನೆಯನ್ನು ಹೊಂದಿ ಸಮಾಜದ ಎಲ್ಲ ಜನಾಂಗದ ಜೊತೆಗೆ ಸ್ನೇಹ ಸೌಹಾರ್ದವನ್ನು ಬೆಳೆಸಿ ವ್ಯವಹರಿಸಿದಾಗ ಅವನ ಬದುಕು ಹಸನಾಗುವುದರಲ್ಲಿ ಸಂಶಯವೇ ಇಲ್ಲ ಎಂದು ಪ್ರಸಿದ್ಧ ಉದ್ಯಮಿ ಬಾಲಾಜಿ ರಾಘವೇಂದ್ರಾಚಾರ್ಯರು ಹೇಳಿದರು.

ಅವರು ಇತ್ತೀಚೆಗೆ ಸ್ಥಳೀಯ ಉಪೇಂದ್ರ ಪೈ ಮೆಮೋರಿಯಲ್ ಕಾಲೇಜಿನಲ್ಲಿ ನಡೆದ ಸದ್ಭಾವನಾ  ದಿನ  ಮತ್ತು ಕೋಮು ಸೌಹಾರ್ದ ಪಕ್ಷಾಚರಣೆಯ ಕಾರ್ಯಕ್ರಮದಲ್ಲಿ ಸಂಪನ್ಮೂಲವ್ಯಕ್ತಿಯಾಗಿ ಮಾತನಾಡುತ್ತಿದ್ದರು. ದ್ವೇಷ, ಅಸೂಯೆಗಳಿಂದ ಏನನ್ನು ಸಾಧಿಸಲೂ ಸಾಧ್ಯವಾಗದು. ಸ್ನೇಹ ಸೌಹಾರ್ದಗಳಿಗೆ ಮನೋವೈಶಾಲ್ಯವು ಅತ್ಯವಶ್ಯವಾಗಿದ್ದು ಸದ್ಭಾವನೆಯನ್ನು ಬೆಳೆಸಿಕೊಳ್ಳುವುದರಿಂದ ಮಾತ್ರ ಅದು ಸಾಧ್ಯವಾಗುವುದಾಗಿ ಅವರು ಈ ಸಂದರ್ಭದಲ್ಲಿ ಹೇಳಿದರು.

ಅಧ್ಯಕ್ಷ ಸ್ಥಾನದಿಂದ ಮಾತನಾಡಿದ ಕಾಲೇಜಿನ ಪ್ರಾಚಾರ್ಯ ಪ್ರೊ.ಕೃಷ್ಣಮೂರ್ತಿ ಕೆ. ಇವರು ಭವ್ಯ ಭಾರತ ನಿರ್ಮಾಣದ ಕೆಲಸವು ಇಂದು ಯುವಪೀಳಿಗೆಯಿಂದ ಆಗಬೇಕಿದ್ದು ಸ್ನೇಹ ಸೌಹಾರ್ದಗಳನ್ನು ಬೆಳೆಸಿಕೊಳ್ಳುವ ಮೂಲಕ ಎಲ್ಲಾ ಕೋಮಿನ ಯುವಕರು ಅದಕ್ಕಾಗಿ ಒಗ್ಗಟ್ಟಾಗಿ ಶ್ರಮಿಸಬೇಕು ಎಂದು ಕರೆ ಇತ್ತರು.

ಸಮಷ್ಟಿಯ ಹಿತವನ್ನು ಬಯಸದ ಮಂತ್ರಗಳೇ ಸಂಸ್ಕೃತದಲ್ಲಿಲ್ಲ. ಸಂಸ್ಕೃತದ ಪ್ರತಿಯೊಂದು ಮಂತ್ರಗಳು ಸಮಗ್ರಪ್ರಪಂಚದ ಹಿತವನ್ನು ಬಯಸುತ್ತವೆ. ಪ್ರತಿ ಪದಗಳು ನಿರ್ವಚನವನ್ನು ಹೊಂದಿದ್ದು ಅನ್ವರ್ಥ ಪದಗಳ ಗಡಣ ಸಂಸ್ಕೃತ ಭಾಷೆಯ ವೈಶಿಷ್ಟ್ಯ ಎಂಬುದಾಗಿ ಪ್ರಸಿದ್ಧ ಉದ್ಯಮಿ ಬಾಲಾಜಿ ಶ್ರೀ ರಾಘವೇಂದ್ರಾಚಾರ್ಯರು ಹೇಳಿದರು.

 ಅವರು ಇತ್ತೀಚೆಗೆ ಸ್ಥಳೀಯ ಉಪೇಂದ್ರ ಪೈ ಮೆಮೋರಿಯಲ್ ಕಾಲೇಜಿನಲ್ಲಿ ಆಯೋಜಿಸಲಾದ ಸಂಸ್ಕೃತೋತ್ಸವ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡುತ್ತಿದ್ದರು. ಪ್ರತಿಯೊಂದು ಪದಗಳ ಮೂಲವನ್ನು ಶೋಧಿಸಿದಾಗ ಭಗವಂತನನ್ನೇ ಪ್ರತಿಪಾದಿಸುತ್ತಿದ್ದು ರೂಢಿಯಿಂದಷ್ಟೇ ಜಗತ್ತಿನ ವ್ಯವಹಾರದಲ್ಲಿ ಅವು ಕಾಣಸಿಗುತ್ತವೆ.  ಪದಗಳ ನಿರ್ವಚನಗಳನ್ನು ಅರಿತು ವ್ಯವಹರಿಸಿದಾಗ ಸಂಸ್ಕೃತ ಭಾಷೆಯ ಸೊಬಗಿನ ಪೂರ್ಣ ಪರಿಚಯವಾಗುವುದಾಗಿ ಅವರು ಈ ಸಂದರ್ಭದಲ್ಲಿ ಹೇಳಿದರು. ಭಗವದ್ಗೀತೆಯು ಇಂದು ವಿಶ್ವಮಾನ್ಯವಗಿರಲು ಅದು ಪ್ರತಿಪಾದಿಸಿದ ಒತ್ತಡ ರಹಿತ ವ್ಯವಹಾರ ನೀತಿಯೇ ಕಾರಣವಾಗಿದ್ದು ಈ ಕಾರಣದಿಂದಲೇ ಪಾಶ್ಚಾತ್ಯ ಶಿಕ್ಷಣ ಸಂಸ್ಥೆಗಳಲ್ಲಿ ಗೀತೆಯನ್ನು ಹೆಮ್ಮೆಯಿಂದ ಪಾಠ್ಯವಾಗಿ ಸ್ವೀಕರಿಸಿರುವಾಗ ನಮ್ಮಲ್ಲಿ ಅದಕ್ಕಾಗಿ ಮೀನಮೇಷ ಎಣಿಸುತ್ತಿರುವುದು ಖೇದಕರ ಎಂಬುದನ್ನೂ ಅವರು ಈ ಸಂದರ್ಭದಲ್ಲಿ ಹೇಳಿದರು.

 ಅಧ್ಯಕ್ಷ ಸ್ಥಾನದಿಂದ ಮಾತನಾಡಿದ ಕಾಲೇಜಿನ ಪ್ರಾಚಾರ್ಯ ಪ್ರೊ.ಕೃಷ್ಣಮೂರ್ತಿ ಕೆ. ಇವರು ಭಾರತೀಯ ಸಂಸ್ಕೃತಿಯ ಪೂರ್ಣಪರಿಚಯ ಸಂಸ್ಕೃತದಿಂದ ಮಾತ್ರ ಸಾಧ್ಯ ಎಂದು ಹೇಳಿದರು.

 ಕಾಲೇಜಿನ ಸಂಸ್ಕೃತ ಪ್ರಾಧ್ಯಾಪಕ ಡಾ|ಮಧುಸೂದನ ಭಟ್ ಪ್ರಾಸ್ತಾವಿಕ ಮಾತುಗಳನ್ನಾಡಿ ಸ್ವಾಗತಿಸಿದರು. ವಿದ್ಯಾರ್ಥಿ ಸುಚೀಂದ್ರ ಧನ್ಯವಾದವಿತ್ತರು. ವಿದ್ಯಾರ್ಥಿ ಜಯಂತ್ ಎಸ್.ಪಿ ಕಾರ್ಯಕ್ರಮ ನಿರ್ವಹಿಸಿದರು.

ಎನ್.ಎಸ್.ಎಸ್.ನಿಂದ ಗ್ರಾಮಿಣ ಬದುಕಿನ ಸಮಗ್ರ ಅಧ್ಯಯನ

ರಾಷ್ಟ್ರೀಯ ಸೇವಾಯೋಜನೆಯ ಮೂಲಕ ರಾಷ್ಟ್ರ ನಿರ್ಮಾಣ ಸಾಧ್ಯ ಎಂದು ಗಾಂಧೀಜಿಯವರು ಮನಗಂಡಿದ್ದರು. ಸ್ವಾತಂತ್ರ್ಯಪೂರ್ವದ ಗಾಂಧೀಜಿಯವರ ಕನಸು ಸ್ವಾತಂತ್ರ್ಯಾ ನಂತರ ಅವರ ಜನ್ಮ ಶತಮಾನೋತ್ಸವ ವರ್ಷದಲ್ಲಿ (1969) ರಾಷ್ಟ್ರೀಯ ಸೇವಾಯೋಜನ ರೂಪದಲ್ಲಿ ಜಾರಿಗೆ ಬಂತು ಇದರಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಳ್ಳುವ ಮೂಲಕ ಭವ್ಯ ಭಾರತ ನಿರ್ಮಾಣದತ್ತ  ವಿದ್ಯಾರ್ಥಿಗಳು ಸಾಗಬೇಕು ಎಂದು ಕಾಪು ವಿಧಾನ ಸಭಾಕ್ಷೇತ್ರದ ಶಾಸಕರಾದ ಶ್ರೀ ಲಾಲಾಜಿ ಆರ್.ಮೆಂಡನ್ ಹೇಳಿದರು.

 ಅವರು ಇತ್ತೀಚೆಗೆ ಉದ್ಯಾವರದ ಪಿತ್ರೋಡಿಯ ಎಸ್.ಎಸ್. ಪಿತ್ರೋಡಿ ಹಿರಿಯ ಪ್ರಾರ್ಥಮಿಕ ಶಾಲೆಯಲ್ಲಿ ಮಂಗಳೂರು ವಿಶ್ವ ವಿದ್ಯಾಲಯ ರಾಷ್ಟ್ರೀಯ ಸೇವಾ ಯೋಜನೆ, ಉಪೇಂದ್ರ ಪೈ ಮೆಮೋರಿಯಲ್ ಕಾಲೇಜಿನ ವಾರ್ಷಿಕ ವಿಶೇಷ ಶಿಬಿರವನ್ನು ಉದ್ಘಾಟಿಸಿ ಮಾತನಾಡುತ್ತಿದ್ದರು. ನಗರ ಪ್ರದೇಶದಲ್ಲಿ ಬೆಳೆಯುತ್ತಿರುವ ಮಕ್ಕಳಿಗೆ ಗ್ರಾಮೀಣ ಬದುಕಿನ ಅಧ್ಯಯನಕ್ಕೆ ಇದೊಂದು ಪೂರಕ ವೇದಿಕೆಯಾಗಿದ್ದು ಗ್ರಾಮೀಣ ಪ್ರದೇಶದ ಸಮಗ್ರ ಅಧ್ಯಯನ ನಡೆದು ಸೇವಾಮನೋಭಾವದ ಭೂಮಿಕೆಯು ಇಲ್ಲಿ ನಿರ್ಮಾಣವಾಗಬೇಕಾಗಿಯೂ ಈ ಸಂದರ್ಭದಲ್ಲಿ ಅವರು ಹೇಳಿದರು.

 ಅತಿಥಿಗಳಾಗಿ ಆಗಮಿಸಿದ್ದ ಪ್ರಸಿದ್ಧ ಪತ್ರಕರ್ತರಾದ ಎಂ.ವಿ.ಕಾಮತ್ ಇವರು ಮಾತನಾಡಿ ಬದುಕಿನ ನಿರ್ದಿಷ್ಟ ಗುರಿಯನ್ನು ತಲುಪುವ ವೇದಿಕೆಯನ್ನಾಗಿ ರಾಷ್ಟ್ರೀಯ ಸೇವಾಯೋಜನೆಯನ್ನು ಬಳಸಿಕೊಳ್ಳ ಬೇಕೆಂದು ವಿದ್ಯಾರ್ಥಿಗಳಿಗೆ ಕರೆ ನೀಡಿದರು.

 ಅಧ್ಯಕ್ಷ ಸ್ಥಾನದಿಂದ ಮಾತನಾಡಿದ ಉಪೇಂದ್ರ ಪೈ ಮೆಮೋರಿಯಲ್ ಕಾಲೇಜಿನ ಪ್ರಾಚಾರ್ಯರಾದ ಪ್ರೊ.ಕೃಷ್ಣಮೂರ್ತಿ ಕೆ. ಇವರು ಸಾಂಪ್ರದಾಯಿಕ ಶಿಕ್ಷಣ ಪಡೆಯುವುದರ ಜೊತೆಗೆ ದೇಶ ಪ್ರೇಮವನ್ನು ಮೂಡಿಸಿಕೊಳ್ಳಲು ರಾಷ್ಟ್ರೀಯ ಸೇವಾಯೋಜನೆಯ ಈ ಶಿಬಿರವು ಸಹಕಾರಿಯಾಗಿದ್ದು ಇದರ ಸದ್ಬಳಕೆಯನ್ನು ಮಾಡಿಕೊಳ್ಳಬೇಕಾದುದು ವಿದ್ಯಾರ್ಥಿಗಳ ಆದ್ಯ ಕರ್ತವ್ಯ ಎಂದು ಹೇಳಿದರು.

 ಉಡುಪಿ ಜಿಲ್ಲಾ ಪಂಚಾಯತ್ ಸದಸ್ಯರಾದ ಶ್ರೀ ದಿವಾಕರ್ ಕುಂದರ್, ಉದ್ಯಾವರ ಗ್ರಾಮ ಪಂಚಾಯತ್ ಅಧ್ಯಕ್ಷರಾದ ಶ್ರೀಮತಿ ಗ್ರೇಸಿ ಮಚಾದೋ, ಉಡುಪಿ ಮಾಜಿ ತಾಲೂಕು ಪಂಚಾಯತ್ ಸದಸ್ಯರಾದ ಶ್ರೀ ಕಿರಣ್ ಕುಮಾರ್, ಎಸ್.ಎಸ್.ಸ್ಮಾರಕ ಎಜ್ಯುಕೇಶನ್ ಟ್ರಸ್ಟ್ ಇದರ ಅಧ್ಯಕ್ಷರಾದ ಶ್ರೀ ಮಹೇಶ್ ಯು, ಕುತ್ಪಾಡಿ ಮೀನು ಮಾರಾಟ ಸಹಕಾರಿ ಸಂಘ ಇದರು ಅಧ್ಯಕ್ಷರಾದ ಶ್ರೀ ಚಂದ್ರೇಶ್ ಕೆ. ಹಾಗೂ ಎಸ್.ಎಸ್.ಪಿತ್ರೋಡಿ ಹಿರಿಯ ಪ್ರಾಥಮಿಕ ಶಾಲೆಯ ಮುಖ್ಯೋಪಾಧ್ಯಾಯಿನಿ ಶ್ರೀಮತಿ ಕುಸುಮ ಪಿ ವೇದಿಕೆಯಲ್ಲಿದ್ದರು.

 ಕಾಲೇಜಿನ ಕನ್ನಡ ಉಪನ್ಯಾಸಕ ಡಾ|ವಸಂತ್ ಕುಮಾರ್ ಪ್ರಾಸ್ತವಿಕ ಮಾತುಗಳನ್ನಾಡಿ ಸ್ವಾಗತಿಸಿದರು. ರಾಷ್ಟ್ರೀಯ ಸೇವಾಯೋಜನೆಯ ಸಂಯೋಜಕ ಶ್ರೀ ರಾಜೇಶ್ ಕುಮಾರ್ ವಂದಿಸಿದರು, ಸಹಸಂಯೋಜಕ ಶ್ರೀ ಚಂದ್ರಶೇಖರ್ ಸಹಕರಿಸಿದರು, ಹಿರಿಯ ಉಪನ್ಯಾಸಕ ಡಾ|ಮಧುಸೂದನ್ ಭಟ್ ಕಾರ್ಯಕ್ರಮ ನಿರ್ವಹಿಸಿದರು.

ಸ್ಥಳೀಯ ಉಪೇಂದ್ರ ಪೈ ಮೆಮೋರಿಯಲ್ ಕಾಲೇಜಿನಲ್ಲಿ ಇತ್ತೀಚೆಗೆ ಏಡ್ಸ್  ಜಾಗೃತಿ ಅರಿವನ್ನು ಮೂಡಿಸುವ ಕಾರ್ಯಕ್ರಮ ಜರಗಿತು. ಸಂಪನ್ಮೂಲ ವ್ಯಕ್ತಿಗಳಾಗಿ ಆಗಮಿಸಿದ ಯುನಿಸೆಪ್ ಪ್ರಾಯೋಜಿತ ಸಮಗ್ರ ಜಿಲ್ಲಾ ಏಡ್ಸ್ ನಿಯಂತ್ರಣ ಕಾರ್ಯಕ್ರಮ ಮತ್ತು ಜಿಲ್ಲಾ ಏಡ್ಸ್ ನಿಯಂತ್ರಣ ಘಟಕ, ಉಡುಪಿ ಇದರ ಯೋಜನ ಮುಖ್ಯಸ್ಥರಾದ ಪ್ರೊ.ಶ್ರೀಪತಿ ಇವರು ಏಡ್ಸ್ ಒಂದು ಮಾರಣಾಂತಿಕ ರೋಗವಾಗಿದ್ದು ಅದರ ಬಗೆಗಿನ ಜಾಗೃತಿಯ ಅರಿವನ್ನು ಪಡೆದುಕೊಳ್ಳುವುದರಿಂದ ಮಾತ್ರ ಆಂತಹ ರೋಗಗಳಿಂದ ದೂರವಿರಲು ಸಾಧ್ಯ ಎಂದು ಹೇಳಿದರು. ಶೈಕ್ಷಣಿಕ, ಔದ್ಯೋಗಿಕ ಮೊದಲಾದ ಕ್ಷೇತ್ರಗಳಲ್ಲಿ ನಮ್ಮ ಜಿಲ್ಲೆಯು ಅಗ್ರಗಣ್ಯವಾಗಿದ್ದು ಏಡ್ಸ್ ಅರಿವನ್ನು ಸಂಪಾದಿಸಿ ಇದರ ಮೂಲಕ ಏಡ್ಸ್ ಮುಕ್ತ ಜಿಲ್ಲೆಯಾಗಿಯೂ ನಾವು ಅಗ್ರಮಾನ್ಯವಾಗಬೇಕೆಂದು ತಿಳಿಹೇಳಿದರು. ಅಧ್ಯಕ್ಷ ಸ್ಥಾನದಿಂದ ಮಾತನಾಡಿದ ಕಾಲೇಜಿನ ಪ್ರಾಚಾರ್ಯರಾದ ಪ್ರೊ.ಕೃಷ್ಣಮೂರ್ತಿ ಕೆ ಇವರು ಎಡ್ಸ್ ರೋಗವು ನಾನಾ ಮೂಲಗಳಿಂದ ಹರಡಬಹುದಾಗಿದ್ದು ಏಡ್ಸ್ ಸೋಂಕಿದೆ ಎಂಬ ಕಾರಣ ಮಾತ್ರದಿಂದ ಆತನನ್ನು ಅಸ್ಪೃಶ್ಯನನ್ನಾಗಿಸದೆ ಮುಖ್ಯ ವಾಹಿನಿಯಲ್ಲಿ ಆತನನ್ನೂ ನಡೆಸಿಕೊಂಡು ಹೋಗುವುದರಿಂದ ಮಾನಸಿಕ ಸ್ಥೈರ್ಯಧೈರ್ಯಗಳು ನೆಲಸಿ ಅವನಲ್ಲಿ ಆತ್ಮ ವಿಶ್ವಾಸ ಮೂಡುವುದಾಗಿ ಹೇಳಿದರು.

ಉಪೇಂದ್ರ ಪೈ ಕಾಲೇಜಿನಲ್ಲಿ ಇತ್ತೀಚೆಗೆ ರಾಷ್ಟ್ರೀಯ ಗ್ರಂಥಾಲಯ ಸಪ್ತಾಹ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಯಿತು. ಸ್ಥಳೀಯ ಎಂ.ಜಿ.ಎಂ. ಕಾಲೇಜಿನ ಗ್ರಂಥಪಾಲಕರಾದ ಶ್ರೀ ದೇವೇಂದ್ರ ಇವರು ಮುಖ್ಯ ಅತಿಥಿಗಳಾಗಿದ್ದರು. ಆಧುನಿಕ ತಾಂತ್ರಿಕ ಯುಗದಲ್ಲಿ ಗ್ರಂಥಾಲಯದ ಸಮಗ್ರ ಪುಸ್ತಕಗಳ ಪೂರ್ಣ ಮಾಹಿತಿಯನ್ನು ಪಡೆದುಕೊಳ್ಳಬಹುದಾದ ಸೌಕರ್ಯವನ್ನು ತಿಳಿಹೇಳುತ್ತ ಗ್ರಂಥಾಲಯದ ಸದ್ಬಳಕೆಯಿಂದ ಪರಿಪೂರ್ಣವಾದ ಜ್ಞಾನವನ್ನು ಪಡೆಯುವ ಅವಕಾಶವಿದ್ದು ಇದನ್ನು ವಿದ್ಯಾರ್ಥಿಗಳು ಬಳಸಿಕೊಳ್ಳಬೇಕು ಎಂದು ಮಾರ್ಗದರ್ಶನವಿತ್ತರು. ಅಧ್ಯಕ್ಷಸ್ಥಾನದಿಂದ ಮಾತನಾಡಿದ ಕಾಲೇಜಿನ ಪ್ರಾಚಾರ್ಯರಾದ ಪ್ರೊ.ಕೃಷ್ಣಮೂರ್ತಿ ಕೆ. ಇವರು ವಿವರಣಾತ್ಮಕ ಗ್ರಂಥಗಳ ಅಧ್ಯಯನವು ಜ್ಞಾನದ ಔನ್ನತ್ಯಕ್ಕೆ ಕಾರಣವಾಗಿದ್ದು ಗ್ರಂಥಾಲಯಗಳು ಇದಕ್ಕೆ ಅವಕಾಶವನ್ನು ಕಲ್ಪಿಸಿಕೊಡುವುದಾಗಿ ಹೇಳಿದರು.

ಗ್ರಂಥಾಲಯ ಸಪ್ತಾಹ ಕಾರ್ಯಕ್ರಮದ ಅಂಗವಾಗಿ ಸಾಮಾನ್ಯ ಜ್ಞಾನ ರಸಪ್ರಶ್ನೆ ಸ್ಪರ್ಧೆಯನ್ನು ಏರ್ಪಡಿಸಲಾಗಿದ್ದು ವಿಜೇತರಿಗೆ ಈ ಸಂದರ್ಭದಲ್ಲಿ ಅಭ್ಯಾಗತರು ಬಹುಮಾನವನ್ನಿತ್ತರು.

ವಿದ್ಯೆಯ ಜೊತೆಗೆ ವಿನಯ, ಮನೋನಿಗ್ರಹ, ಸಂಘಟನ ಶಕ್ತಿ, ಸಹಬಾಳ್ವೆ, ಸೌಹಾರ್ದ ಇವೇ ಮೊದಲಾದ ವ್ಯಕ್ತಿತ್ವದ ಸರ್ವಾಂಗೀಣ ವಿಕಸನಕ್ಕೆ ಎನ್.ಎಸ್.ಎಸ್. ಸೂಕ್ತವೇದಿಕೆ ಎಂದು ಪೂರ್ಣಪ್ರಜ್ಞಕಾಲೇಜಿನ ಸಂಸ್ಕೃತವಿಭಾಗ ಮುಖ್ಯಸ್ಥರಾದ ಡಾ|ರಮೇಶ್ ಟಿ.ಎಸ್ ಹೇಳಿದರು.